Олий Мажлис Сенати Раиси Танзила Норбоева кеча Самарқанд шаҳрида БМТнинг Чўлланишга қарши кураш тўғрисидаги конвенциясининг (UNCCD) бажарилишини кўриб чиқиш қўмитасининг 21-сессияси доирасида БМТ бош котиби ўринбосари, Чўлланишга қарши кураш конвенцияси ижрочи котиби Иброҳим Тиау билан учрашди.
Парламент юқори палатаси маълумотига кўра, мулоқот давомида кўлами глобал тарзда кенгайиб бораётган чўлланиш ва ер деградацияси, чанг бўронларининг олдини олиш, биохилма-хилликни сақлаб қолиш йўналишида БМТнинг ихтисослашган тузилмалари билан ҳамкорликни кучайтириш масалалари муҳокама қилинди.
Маълумот ўрнида айтиш жоиз, Ўзбекистон Осиё минтақасидаги давлатлар орасида биринчилар қаторида БМТнинг Чўлланишга қарши кураш конвенциясига аъзо бўлган. Ушбу Конвенция 1995 йил 31 августда Ўзбекистон парламенти томонидан ратификация қилиниб, 1996 йилда кучга кирган. Бугунги кунда мазкур Конвенцияга 197 та давлат аъзо ҳисобланади.
Глобал экологик муаммолар шароитида Ўзбекистонда атроф-муҳитни муҳофаза қилиш ва экологик вазиятни яхшилашга қаратилган амалий чоралар хусусан, қонунлар, норматив-ҳуқуқий ҳужжатлар, давлат дастурларини қабул қилиш ва амалга ошириш борасидаги ишларга тўхталиб ўтилди.
Иброҳим Тиау Ўзбекистоннинг яшиллик оламини қайта тиклаш борасидаги ташаббуслари, эришаётган ютуқлари нақадар жиддий эканини, ерлар деградациясининг олдини олиш, шунингдек, ернинг қайта тикланиши бўйича мамлакат кенг кўламли ишларни амалга оширган ҳолда етакчи давлатлар қаторига киргани, олиб борган амалий ҳаракатлари билан барчага намуна бўла олганини таъкидлаб ўтди.
Учрашув якунида экологик кун тартиби, атроф-муҳит ва иқлим ўзгариши билан боғлиқ масалалар юзасидан мулоқот ва ҳамкорликни изчил давом эттириш, оқибатларни юмшатиш бўйича қўшма ҳаракатлар ва чораларни ишлаб чиқишга келишиб олинди.