2402/18

ЎЗБЕКИСТОН ТИВ РАҲБАРИ ЭРОН ПРЕЗИДЕНТИ БИЛАН УЧРАШДИ

2018-йилнинг 10-феврал куни Ўзбекистон Республикаси Ташқи ишлар вазири Абдулазиз Камилов бошчилигидаги делегация Эрон Ислом Республикаси Президенти Ҳасан Руҳани томонидан қабул қилинди.

Суҳбат чоғида Вазир Эрон Президентига учрашув ўтказиш ва Ўзбекистон-Эрон мулоқотининг долзарб масалаларини муҳокама қилиш имконияти учун миннатдорчилик билдирди ҳамда Ўзбекистон Раҳбари Шавкат Мирзиёевнинг Ҳасан Руҳани ва Эрон халқига самимий тилакларини етказди.

Учрашувда Ўзбекистон ва Эрон президентларининг 2017-йил 10-сентабрда Остона шаҳридаги учрашувида эришилган келишувларни амалга ошириш нуқтайи-назаридан икки томонлама алоқаларни ривожлантириш истиқболлари муҳокама қилинди.

Суҳбатда қатор минтақавий муаммолар, хусусан Афғонистондаги вазият юзасидан фикр алмашилди. Афғонистон инқирозини сиёсий ҳал қилиш жараёнини бошлаш учун биргаликдаги халқаро саъй-ҳаракат муҳимлиги қайд этилди.

Эрон раҳбари “Тинчлик жараёни, хавфсизлик соҳасида ҳамкорлик ва минтақавий шерикчилик” номли Афғонистон бўйича халқаро конференсия ўтказишга доир Ўзбекистон ташаббусини қўллаб қувватлади.

Учрашувда томонларни қизиқтирган бошқа сиёсий ва иқтисодий масалалар ҳам муҳокама қилинди.